suencyin 食記: 逸群雞飯

suencyin 食記: 逸群雞飯

逸群
逸群雞飯﹐有人話好好﹐有人話名不副實。我好耐以前去過﹐印象唔係好好﹐近日有個手談架步係個邊﹐正好去試真的味道。

對上星期六七點幾﹐去到座無虛席﹐門口企滿人﹐只好走頭﹐但引起我既好奇心﹐因為大部份都係本地人﹐唔通坡人唔識分好醜﹖

上星期六專登去食午飯﹐入到去只有兩檯客﹐入門有個雞檔﹐有的似我地既燒臘檔﹐擺滿二十幾隻雞﹐一個大砧板。我以前講過﹐正宗海南雞係唔吊起賣既﹐呢間就係示範。

同個雞檔師傅示好﹐要一隻雞腿。佢問係一碗雞飯加雞腿還是雞腿飯﹐我問雞腿飯價錢﹐五個六﹐都幾貴﹐唔係好有信心﹐叫碟雞腿飯先。

坐低﹐廚房捧出一碗飯﹐一碗湯。雞腿斬緊﹐未到。試下的湯﹐淡而無味﹐一的雞味都無。唔信﹐再認真飲多啖﹐依然揾唔到雞味﹐點都俾唔到分。

試一啖飯﹐唔錯﹐淡淡清香﹐唔似得坊間落重雞油﹐一來搶飯味﹐二來嗆喉。雞來﹐唔加醬食一件﹐好家伙﹐有雞味﹐配得上佢地既盛名。自己倒醬﹐有豉油﹐辣椒﹐蒜蓉。的豉油放係普通豉油樽﹐唔顯眼﹐點知同其他兩樣一夾﹐配雞剛剛好。

再食多幾件雞﹐越食越有味﹐食得性起﹐叫多一碟﹐風捲殘雲。研究一下﹐的雞一的肥肉都無﹐可能迎合顧客口味﹐而家人人講健康﹐不過對我黎講﹐美中不足也。

食食下﹐有對拖友入黎﹐叫一份雞飯﹐一碟通菜﹐見佢地忙住影相﹐原來係遊客﹐叫野甘少﹐一定係少食多餐﹐要嘗盡各店美味。

埋單﹐十蚊六毫﹐即係一碟雞五蚊﹐飯六角﹐雞腿同價。

總結﹐醬最好﹐雞同飯亦唔錯﹐湯不值一提。誠美味也﹐但要做天下數一數二﹐未輪到佢。

檢視較大的地圖

逸群海南雞飯
地址: 25, Purvis Street, Singapore 188602